Англија без Рашфорд и Маунт против Италија и Украина
Манчестер јунајтед објави дека Маркус Рашфорд, кој беше на теренот до 83 минута, доби удар во акцијата која му претходела на водечкиот гол на Фулам во 50 минута во рамките од ФА купот.
Напаѓачот на „црвените ѓаволи“ поради повреда ќе го пропушти почетокот на квалификациите за Европското првенство 2024 и натпреварите на Англија против Италија во Неапол во четврток и против Украина на Вембли во недела.
Освен Рашфорд, кој оваа сезона постигна 30 гола за Јунајтед и Англија и беше прогласен за играч на месецот во Премиер лигата за февруари, англискиот селектор Герет Саутгејт нема да може да смета на играчот од средниот ред на Челси, Мејсон Маунт на натпреварите против Италија и Украина.
Фудбалерот на лондонските „сини“ до сега сезонава во Премиер лигата запиша 23 настапи и три погодоци.
Потсетување дека во квалификациската група „Ц“ се наоѓа и македонската А репрезентација која на 23 март во Скопје ќе биде домаќин на Малта.