Американското Министерство за одбрана го следи блиското поминување на вселенското летало на НАСА, ТИМЕД, со рускиот сателит Козмос 2221, објави НАСА.

Иако се очекува леталата да се разминат без проблем, судирот може да резултира со голема штета, соопшти американската вселенска агенција, додавајќи дека продолжува да ја следи ситуацијата во соработка со Министерството за одбрана.

Во соопштението за медиумите не се наведува колку леталата ќе се приближат едно до друго, но се проценува дека леталата, кои не можат да маневрираат, треба да бидат најблиску едно до друго во 7:30 часот на 28 февруари на надморска височина од околу 600 километри.

Мисијата ТИМЕД го проучува влијанието на Сонцето и луѓето врз мезосферата на Земјата, долната термосфера и јоносферата.