Алпинистот Надир Мурсели од Тетово сам, со автобус отиде во Турција да помага во спасувањето
Тетовскиот алпинист и спасител Надир Мурсели самоиницијативно се качил на автобус и заминал за Турција за да помогне во напорите за пребарување на урнатините и спасување на преживеаните во катастрофалниот земјотрес.
Во Истанбул, негова внука и зетот му помогнале да го продолжи патот до погодените области – до Адана заминал со авион, а оттаму, заедно со спасувачи од други тимови, четири часа со автобус патувале до најпогодениот град Кахраманмараш.
Веднаш штом пристигнал, се вклучил во акција, работејќи заедно со тимови од Република Српска и Киргистан, вели Мурсели во изјава за „Фокус“.
„Состојбата е многу лоша, има многу мртви луѓе и се надеваме дека ќе спасиме повеќе лица од под урнатините. Случајно се најдов со тимот од Република Српска и кога дознаа дека сум сам, тие ме зедоа со нив“, вели алпинистот.
Тетовскиот алпинист течно зборува турски јазик, па на колегите-спасувачи од Босна и Херцеговина, освен во пребарувањето на урнатините, им помогнал и со преведувањето.
Неколку стотици спасители од Македонија, во организација на Владата, општини и Дирекцијата за заштита и спасување, се на терен во Турција и помагаат во расчистувањето и во потрагата по преживеани. Во двата силни земјотреса кои неделава ги погодија јужните делови на Турција и Сирија, според досегашните податоци загинале околу 25.000 луѓе, а преку 85.000 се повредени.