Од Општина Аеродром информираат дека се воведува нова онлајн анкета преку која граѓаните ќе можат да дадат оцена и мислење за квалитетот на работењето на Општината, како и за работата на секој вработен поединечно.

„Целта на оваа иницијатива е директно вклучување на граѓаните во процесот на унапредување на локалната самоуправа, преку идентификување на позитивните практики, како и на областите во кои постои простор за подобрување. На тој начин, Општина Аеродром се стреми кон поефикасно, поодговорно и поотворено институционално работење“, велат од локалната самоуправа.

Оттаму велат дека анкетата е кратка, трае помалку од една минута и е целосно анонимна. При нејзиното пополнување не се прибираат лични податоци, а граѓаните можат да учествуваат со скенирање на кју-ар кодот поставен на официјалните информативни банери, по што се отвора кратка анкета што се пополнува со неколку клика.