Жителите на Турско Рудари со апел до надлежните: Не ни ја земајте водата!
Не ни ја земајте водата и не ни ја уништувајте вековната традиција за производство на овошје и градинарски култури, побараа на средбата со надлежните во Министерството за животна средина и просторно планирање претставници на месната заедница од пробиштипското село Турско Рудари, каде неодамна почна изградба на мала хидроцентрала на реката Шталковица.
На средбата со претставници на Секторот за води при Министерството, надлежен за издавање на дозволи за изградба на мали хидроцентрали тие им го соопштија ставот на локалното население против изградбата на мала хидроцентрала на Шталковичка река, единствен извор на вода за пиење и за наводнување на нивите и на бавчите.
– Пет века долгата традиција на одгледување на земјоделски култури од кои преживуваат жителите на Турско Рудари ќе се уништи ако рекичката, која и онака едвај ги задоволува нашите потреби, ја стават во цевки долги два ипол километра, рече Јаким Јовановски, претставник на селото кој нагласи дека без вода нема да има ниту живот во селото.
Жителите на Турско Рудари тврдат дека не знаеле дека некој донел одлука да се зафати и затвори во цевки нивната река и дека никој за ништо не ги прашал.
Концесијата на Мала Река кај Градче е дадена без да ги прашаат граѓаните
На средбата зеле учество и граѓански активисти од Кочани, кои бараат да не се гради мала хидроцентрала на Мала Река кај акумулацијата Градче, исто така аргументирајќи дека тој зафат трајно ќе ја уништи реката, нејзиниот жив свет и околината, а ќе ја загрози и акумулацијата Градче. Тие, исто така, тврдат дека јавноста не била уредно информирана ниту биле консултирани при носењето на одлуката за изградба на хидроцентралата.
За двете хидроцентрали концесијата ја има ДИС енергија од Скопје. Тие за Слободен Печат изјавија дека ќе ги градат двете хидроцентрали бидејќи ги имаат сите потребни документи и дека се работи за многу профитабилен бизнис.
Пробиштипското село Турско Рудари на нозе: Жителите на протест против изградба на мини хидроцентрала