Египет ќе го пријави главниот град Каиро за организација на Летните олимписки игри во 2036 година, најави египетскиот министер за млади и спорт Ашраф Соби.

Досега ниту една арапска или африканска земја не била домаќин на Летни или Зимски олимписки игри.

Египетскиот претседател Абдел Фатах Ал-Сиси даде зелено светло за доставување на кандидатурата, додаде министерот Соби за време на приемот на претседателот на Меѓународниот олимписки комитет (ИОК) Томас Бах во Каиро.

Во соопштението објавено од египетската влада се цитираше изјавата на Бах дека спортската инфраструктура на Египет е способна да биде домаќин на настанот.

Наредните Летни олимписки игри ќе се одржат во Париз 2024 година, потоа следен домаќин ќе биде Лос Анџелес во 2028 година и Бризбејн во 2032 година.

Процесот за пријавување за домаќин на Олимпијадата во 2036 година се уште не е официјално започнат, а се шпекулира дека интерес за организација ЛОИ има од Германија, Мексико, Турција, Русија, Индија и Катар.