Околу 200 милитанти се убиени во напади на руските воздушни сили врз две бази во близина на археолошкиот локалитет Палмира во Сирија, соопшти заменик директорот на Рускиот центар за помирување на спротивставените страни во Сирија, Александар Карпов.

Тој додаде дека во нападот биле уништени околу 500 килограми воена опрема, како и значително количество оружје, муниција, возила и компоненти за производство на експлозивни направи.

-Врз основа на разузнавачки информации, утврдено е дека милитантите поставиле тајна база во близина на Палмира за обука на групи за извршување терористички напади во различни делови на земјата и производство на експлозивни направи, рече Карпов, пренесен од Тасс.

Карпов додаде дека милитантите подготвувале терористички напади врз владините институции во поголемите градови пред претседателските избори закажани за 26 мај.

Тој истакна дека милитантите тренирале на локации што не се контролирани од сириската Влада, вклучувајќи и ја зоната Ал-Танф, која е под контрола на САД.