Група граѓани, кои носеа патриотски обележја и знамиња, вечерва се организираа на централниот скопскиот плоштад и тргнаа да чуваат таканаречена „ноќна стража“ пред црквата Свети Спас и гробот на Гоце Делчев, еден ден пред најавеното одбележување на денот на кој е роден македонскиот револуционер.

Групата од стотина луѓе се собра на плоштадот Македонија, од каде се упати кон црквата Св. Спас, но беа запрени на релативно голема далечина, каде што е поставен полициски кордон кој го обезбедува околниот простор. Тие негодуваа до полицајците поради тоа што не ги пуштаат да одат понатаму, па пееја патриотски песни и извикуваа „Никогаш Северна, само Македонија“.

Собраните граѓани најавуваат дека таму ќе ја минат ноќта. Дел од нив најавија дека во текот на вечерта ќе го блокираат и целиот мост „Гоце Делчев“, во знак на протест поради тоа што им е попречено движењето и не ги пуштаат да стигнат до црквата Свети Спас.