ВИДЕО: Германија броеше до седум, Украинците со успешен тест пред Амстердам!
После ремито со Данска (1:1) пред пет дена, вечерва германската репрезентација го имаше последниот пријателски натпревар пред настапот на Европското првенство.
Избраниците на селекторот Јоаким Лев во Дизелдорф убедливо со резултат 7:1 ја совладаа селекцијата на Летонија. Во победничките редови по еднаш во листата на стрелците се запишаа Госенс, Гундоган, Милер, Гнабри, Вернер и Сане, автогол си постигна Озолс, а на спротивната страна во 75 минута стрелаше Савелјевс.
Германците на ЕП се наоѓаат во групата „Ф“ со селекциите на Франција, Унгарија и актуелниот европски шампион Португалија.
Украина која е еден од ривалите на Македонија во групата „Ц“ на еврошампионатот, после минималната победа над Северна Ирска (1:0), забележа уште еден триумф овојпат над Кипар (4:0) во Харкив.
Гол-серијата ја стартуваше Јармоленко со гол од пенал, од белата точка непосредно пред паузата предноста ја зголеми Зинченко. Во 59 минута за 3:0 се погрижи Јаремчук, а конечниот епилог го постави Јармоленко со својот втор погодок.
Играчите на Андриј Шевченко сега целосно ќе се фокусираат на ЕП каде што својот прв меч ќе го имаат на 13 јуни против Холандија во Амстердам со почеток од 21.00 часот во „Јохан Кројф“ Арената.