Контејнери поставени на велосипедските патеки, канделабри кои го попречуваат движењето, непрописно паркирани автомобили, поставување на урбана опрема на патеките, високи рабници… Ова се само дел од проблемите со кои се соочуваат велосипедистите додека возат низ Скопје.

– Вакви „детали“ ја прават целата разлика. Вакви детали влијаат на чувството на безбедност и задоволство на граѓаните при користење велосипед и влијаат на процентуалното учество на велосипедскиот сообраќај во вкупниот. Важно е да се зголемува велосипедската мрежа, но важно е да се прави тоа и по стандарди. Вакви „детали“ за жал има и на најдобрите патеки низ градот! Минување низ автобуски постојки, остатоци од канделабри, неспуштени рабници на пешачки острови, незаштитени пешачки острови…- велат од граѓанската иницијатива „На Точак“.

За коплетно да се промени моменталната состојба на терен, да се зголеми безбедноста на сите учесници во сообраќајот вклучително и на велосипедистите се со цел колку што е можно поголем број на граѓани велосипедот да го користат како превозно средство за да стигнат на работа или пак до училиште, од „На точак“ бараат конечно да се направат конкретни промени кои се повеќе од потребни.

– Поради вакви ситуации бараме строги политики за правила за урбана опрема (контејнери, тераси од кафеани. билборди), за јавно паркирање, физичка заштита на патеките и квалитетно уредување и озеленување, како и стандардизирање на планирањето и проектирањето на велосипедската инфраструктура (димензиите, решенијата на крстосници, густина на велосипедска мрежа итн.) и пропишување на градски процедури, прирачници и детали по примерот на европските градови – децидни се велосипедистите.