Дали ви се случило да бидете полни со енергија кога ќе се вратите дома, но штом ќе се најдете во прегратките на партнерот – почнувате да се чувствувате поспано? Многумина ја доживеале оваа ситуација, па имаат впечаток дека близината со партнерот ги смирува, пишува „Жена“.

Почнувате да зевате кога сте покрај партнерот? Не грижете се, тоа не значи дека вашата сакана личност е здодевна. Сосема спротивно – тоа значи дека сте сигурни и опуштени еден со друг.

„Чувството на сигурност го активира парасимпатичниот дел од нашиот нервен систем. Нашите зеници се шират, здивот ни се продлабочува и отчукувањата на срцето паѓаат додека нашето тело полека се релаксира. Ова значи дека нашето тело се подготвува за одмор. Еве зошто се случува брзо да заспиете покрај партнерот “, објаснува психотерапевтката Таша Бејли за порталот „Гламур“.

„Хемикалии“ кои поттикнуваат сон

Токму поради чувството на сигурност и релаксација, многу парови бргу заспиваат. Покрај тоа, поминувањето време со саканата личност го активира окситоцинот, кој нè релаксира и предизвикува добри чувства и квалитетен сон. Покрај тоа, тука е и серотонинот, кој прави да се чувствуваме задоволни кога сме блиски со саканата личност. Кога сите овие „хемикалии“ протекуваат низ нашето тело, ние сме добро расположени, што му сигнализира на мозокот дека е време за целосна релаксација, а ако сме уморни – да спиеме.

Се разбира, блаженото чувство на заедништво завршува за многу луѓе кога нивниот партнер ќе почне да ‘рчи. Затоа, многумина спијат одделно, што дури може да има позитивни ефекти врз врската. Затоа двојката повеќе ги цени моментите пред спиење, а поспаноста ги намалува тензиите и лошото расположение. Сепак, одморот и спиењето покрај партнерот има свој шарм – особено во раните фази на врската.

„Гламур“, на пример, пишува дека нежниот ритам на дишење на вашиот партнер може да го регулира вашиот ритам и дополнително да ве опушти, секако под услов другата половина да не ‘рчи гласно. Ова е уште една причина зошто паровите сакаат да одат на одмор заедно.

Мирисот прави чуда

Но, тоа не е сè! Ако зевате покрај партнерот или имате чувство дека ќе запиете во секој момент, не грижете се. Можеби тоа е поради неговиот/нејзиниот мирис. „Мирисот може значително да го активира нервниот систем за да се чувствуваме безбедно и опуштено“, вели Бејли.

„Мирисите ги поврзуваме со спомени и искуства. Така, ако некој мирис нè потсетува на чувство на сигурност, веднаш ќе се опуштиме и ќе се чувствуваме подобро“, вели експертот.

Тоа е причината зошто многу луѓе сакаат да се потпираат на партнерот и да го мирисаат неговиот парфем по кој е препознатлив.