Веб страната на јавни набавки работи по принципот тргни – застани

Фото: МИА

Интернет страницата на Електронскиот систем за јавни набавки (ЕСЈН) по неколку дена надвор од функција од вчера повторно стана достапен за јавноста. Иако се уште страницата не е во целосна оперативност на ЕСЈН може да се прочита порака во која се посочува дека техничкиот проблем кој доведе до нејзина недостапност е целосно надминат, како и дека интегритетот на системот не е загрозен.

ФОТО : Сајтот на е-системот за јавни набавки

„Овозможен е пристап до сите податоци кои беа на располагање на јавната страна. Очекуваме од вторник, системот да е целосно функционален, при што ќе можат да продолжат сите започнати постапки без ограничување и да се спроведуваат нови согласно законските одредби“, пишува во пораката на веб-сајтот.

Моментално се работи на продолжување на роковите на сите тековни постапки, се вели во пораката, и се додава дека поради тоа е оневозможено најавување на веб-сајтот.

Истовремено, оттаму соопштуваат дека наредните денови очекуваат нормализирање на сите функции на системот, за што најавија дека дополнително ќе ја информираат јавноста.

Во меѓувреме, сè уште е недостапен веб-сајтот на Бирото за јавни набавки. Слободен печат на неколку наврати досега информираше за недостапноста на овој сервис за граѓаните каде од институцијата во изјава за нашиот медиум директорот Директорот на Бирото за јавни набавки, Борче Хаџиев не информираше дека станува збор за поголем технички проблем на кој се работи за негово целосно остранување.

Претходно, на предлог на заменик-претседателката на Владата задолжена за политики за добро владеење Славица Грковска, Владата ги задолжи сите буџетски корисници да ја унапредат транспарентноста во процесот на јавните набавки и да ги објавуваат сите податоци на нивните веб-страници.

Од Владата посочија дека сите буџетски корисници и единки корисници, се должни во рок од 30 дена да креираат посебен дел на нивните веб-страници насловен „јавни набавки“. Таму, предвидуваат да се објавуваат годишниот план за јавни набавки, огласи за јавни набавки, известувања за склучени договори, склучени договори, како и известувања за реализирани договори.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот