Ракометарите на Вардар вечерва (18.45 часот) ги продолжуваат настапите во Лигата на шампионите со гостувањето кај францускиот Монпелје.

„Црвено-црните“ лошо ја завршија 2021 година, нанижаа седум порази по ред во ЛШ, а серијата започна во Скопје токму со натпреварот против Монпелје. Лошата серија му пресуди на Веселин Вујовиќ и во вториот дел од сезоната екипата ќе ја предводи Давид Дејвис.

– Играме против Монпелје, прв меч во Лигата на шампионите после паузата и мислам дека е најтежок противник, игра одлично во ЛШ, се на првата позиција на табелата. Не изгледаа толку добро до декември во домашното првенство, но во ЛШ е сосема друга приказна. Ова ќе биде прв натпревар во ЛШ по паузата, ќе биде многу тешко. Но, ние мораме да ја играме нашата игра, да веруваме во нас, и да одиме таму со оптимизам. Како и секогаш одиме на победа. Во првенство играме добро, во СЕХА топло ладно, и во ЛШ засега не сме на посакуваната позиција. Секако дека нашата желба е да бидеме меѓу првите шест екипи – вели Дејвис.

Дејвис за вечерашниот натпревар против Монпелје нема да може да смета на Борко Ристовски, Анте Гаџа и на Марко Мишевски и на нивно место ќе настапат Стефан Крстевски и Мартин Карапалевски.

И без помошта на Ристовски и на Гаџа, вардарци немаат намера да се предадат и се надеваат на поволен резултат.

– Прв натпревар во вториот дел од ЛШ. Озбилен противник кој е лидер во нашата група. Самото тоа што се први на табелата кажува за каков противник станува збор. Одиме во Франција да се надигруваме со нив и нема да се предадеме. Тие не победија на домашен терен, но сега имаме нов тренер нов систем и верувам во поволен резултат иако се многу квалитетни. Ќе биде навистина тешко. Гледавме некои нивни натпревари, се работи за феноменална екипа, но имаме шанси и треба да се надеваме на поволен резултат – вели Георгиевски.