За само еден час во Велес волонтери бесплатно поделија околу две илјади табли јајца, како донација од велешани кои живеат и работат во САД, односно од компанијата „Шилер“, чија дејност е камионски превоз на стока, објави СДК.мк.

Во еден момент, поради големата метеж и безредието што се создадоа, мораше да интервенира и полицијата за да воведе ред и да спречи евентуално стампедо и повреди кај граѓаните.

Некои од присутните земаа и по две-три табли со објаснување дека ги земаат за болни роднини или за соседи кои не можеле да дојдат. Граѓаните добија табли со јајца кои на пазарот вредат 300 денари, а пред покачувањето, пред десетина дена, чинеа 200 денари. Покрај јајцата, тие добиваа и по една кесичка црвена боја. За најмладите беше организирана забава со кловн и цртање велигденски мотиви.

Ова е трета година како компанијата „Шилер“ во Велес бесплатно дели табли со јајца.