Ерфан Солтани, кој беше уапсен за време на антивладините протести во Иран и се стравуваше дека ќе биде осуден на смрт, е ослободен со кауција, објавија организација за човекови права и иранските државни медиуми. Солтани (26) беше уапсен минатиот месец додека земјата беше потресена од протести што предизвикаа насилна реакција од властите, пишува Си-ен-ен.

Тој беше приведен на 10 јануари во неговиот дом во Фардис, град четириесет километри западно од Техеран. Според државната телевизија ИРИБ, тој е обвинет за „собирање и договарање против внатрешната безбедност на земјата“ и за „пропагандни активности“ против режимот.

По неговото апсење, американскиот Стејт департмент и роднина на Солтани објавија дека иранските власти имаат намера да го погубат. Иранското судство ги отфрли тврдењата како „измислени вести“, објави ИРИБ. Семејството на Солтани подоцна изјави дека неговата егзекуција е одложена.

Американскиот претседател Доналд Трамп рече дека бил уверен од „доверливи извори“ дека Иран не планира егзекуции и го предупреди Техеран да не го прави тоа, велејќи дека САД ќе „преземат силни мерки“.

Солтани беше ослободен со кауција во саботата, потврди норвешката група за човекови права „Хенгау“. Неговото ослободување го потврди и иранскиот државен медиум „Прес ТВ“ во објава на „Телеграм“.

Протести и брутална репресија

Неизвесната судбина на Ерфан Солтани стана еден од најследените случаи на меѓународно ниво за време на големите антивладини протести што го зафатија Иран минатиот месец. Иранските безбедносни сили одговорија со брутална репресија и продолжени исклучувања на интернет низ целата земја.

На 19 јануари, Си-ен-ен објави, повикувајќи се на Хенгав и еден од роднините на Солтани, дека демонстрантот е во добра физичка здравствена состојба и дека можел да се сретне со своето семејство. Неговиот братучед, идентификуван како Сомаје, минатиот месец за Си-ен-ен изјави дека Солтани бил „неверојатно сладок и со топло срце млад човек“ кој „секогаш се борел за слободата на Иран“.

Според неодамнешните извештаи на американската новинска агенција за активисти за човекови права (ХРАНА), повеќе од 6.400 демонстранти се убиени, а над 1.000 се уапсени откако избувнаа протестите минатиот месец.

Агенцијата додаде дека дополнителни 11.280 смртни случаи сè уште се разгледуваат. Си-ен-ен не можеше независно да ги потврди тие бројки.

И покрај исклучувањето на интернетот, деталите за бруталната репресија продолжија да се појавуваат. Сведоци, активисти за човекови права и медицински експерти за Си-ен-ен изјавија дека безбедносните сили започнале широко распространето насилство врз демонстрантите.