Суперлига: Вардар оствари важна победа во дербито против Еурофарм Пелистер
Денеска во СЦ „Јане Сандански“ во Скопје во дербито на македонската ракометна Суперлига екипата на Вардар пред своите навивачи со 24:20 славеше против Еурофарм Пелистер.
По првото полувреме играчите на тренерот Владо Недановски имаа само еден гол разлика (12:11).
Во самиот финиш од мечот на семафорот стоеше нерешени 20:20, а потоа сите дилеми околу победникот ги решија скопските „црвено-црни“ со серија од четири голови.
Во победничките редови Јасухира шест пати се запиша во листата на стрелците, а по четири имаа Георгиевски, Петриќ и Родригез.
За битолскиот тим најефикасен беше Цехте со шест погодоци, а по два помалку запишаа Пешевски и Радивојевиќ.
На табелата и натаму е лидер Еурофарм Пелистер со 23 бодови, сега само два повеќе од второпласираниот Вардар.