„Министерството за образование и наука не исполни ништо од ветеното, не ги почитува самопоставените рокови, па затоа најавуваме најавуваме протести и блокади на цело Скопје. Не како минатиот пат со еден протест и еден марш, туку секојдневна блокада на сите булевари во главниот град“, најавуваат од студентската организација Студентски отпор.

Во соопштението од организацијата се вели дека МОН не ги почитува законските рокови и ветувањата: се доцни со исплата на субвенциониран студентски оброк, студентите кои се прифатени за стипендија немаат видено ниту денар, се доцни и со исплата на стипендии за студентите кои ја продолжуваат стипендијата, а не е почната ниту ветената реконструкција на студентските домови.

„Преговорите за новиот закон за студентски оброк се одвиваат нетранспарентно и нема никакви официјални информации во однос на тоа како би се одвивала зголемената исплата од неверојатни 140 денари на дневно ниво. Најнова информација од МОН е дека до 15 март сите средства ќе бидат исплатени и сите сметки подмирени. Сакаме да веруваме дека е тоа така, иако согласно на досегашното искуство не можеме да бидеме оптимисти и да им веруваме на збор“, велат од Студентски отпор.