Стартот на Бундеслигата е закажан за септември
Новата сезона во Бундеслигата ќе започне на 18 септември, додека последното коло е предвидено да се игра на 22. мај 2021 година, објави Германската фудбалска федерација.
Стартот на сезоната во Бундеслигата обично е во вториот викенд од август, но новата сезона ќе започне еден месец подоцна поради принудната пауза од три месеци во оваа сезона поради пандемијата на коронавирусот.
Поради одложувањето на стартот на новата сезона, зимската пауза која вообичаено трае шест недели, сега ќе биде намалена и вториот дел од сезоната наместо кон крајот на јануари 2021 година ќе започне на првиот викенд во новата година.
Фудбалската сезона во Германија вообичаено започнува со натпреварите од Купот, а првото коло ќе се игра од 11. до 14. септември, додека финалето кое традиционално се игра на Олимпискиот стадион во Берлин ќе се одигра на 13.мај 2021 година.