Списание за литература, култура и уметност: „Современост“ со нов дизајн
Неодамна излезе број 01/2020 на списанието за литература, култура и уметност „Современост“, кое како директен наследник на списанието „Нов ден“, објавено во 1945 година, може да се смета за најстарото литературно списание во државата, со неговиот прв број што се појавил од 1951 година.
Во редакцијата на „Современост“ сега влегоа млади писатели и поетеси, како Стефан Марковски на функцијата главен и одговорен уредник, Снежана Стојчевска, како извршна уредничка, и Никола Алтиев, уредник. Соодветно на младешкиот елан и ентузијазам, новиот број на „Современост“ излезе со нов дизајн, со седум рубрики и еден ин мемориам во својата содржина, како и со повеќе прилози од македонски и странски поети, прозаисти, драматурзи, есеисти и книжевни критичари.
Објавувањето на списанието е помогнато од Министерството за култура.
(Текстот е објавен во „Културен печат“ број 48, во печатеното издание на „Слободен печат“ на 12-13 септември 2020)