Социјалните служби од Струмица одредија старател за трите малолетници од семејството на повреденото 4-годишно девојче
Откако со тешки повреди по телото пред 5 дена четиригодишно девојче е згрижено во Клиничкиот центар во Скопје, социјалните служби за другите три малолетни деца од ова семејството одредиле старател по службена должност, потврдија од Министерството за труд и социјална политика за Телма.
Згрижувањето на трите деца доаѓа откако случајот го пријавиле од општата болница во Струмица по што тим од Центарот за социјални работи излегол на терен и утврдиле дека децата привремено се згрижени кај дедото, а отпочната е процедура за сместување во згрижувачко семејство.
Од Министерството за труд и социјална политика велат дека семејството не е евидентирано во систем, бидејќи привремено престојувале во Струмица и немале лични документи, па не остваруваат ниту права од социјална и детска заштита, објави Телма.
Службите на Министерството, согласно законските прописи ќе пристапат и кон работа со мајката заради зајакнување на капацитетите во делот на родителство и грижа за децата, а во тој период децата ќе бидат сместени во згрижувачко семејство.
Инаку, четиргодишното девојче со гангренозни рани и скршени ребра првично е примено во струмичката болница по што поради сериозноста на повредите, истиот ден е префрлено на Детската клиника во Скопје.
За случајот ОЈО Струмица отворени и истрага која ги проверува наводите на мајката дека девојчето е повредено при напад на куче.
Стабилна состојбата на четиригодишното девојче
Четиригодишното дете од Струмица во моментов е со стабилни витални параметри, на лекување и следење на Одделот за гастроентерохепатологија, потврди за МИА, директорката на Клиниката, Валентина Цвејоска – Чолаковска.
– Во лекувањето се вклучени и колегите од Клиниката за детска хирургија, а конзилијарно е водено со повеќе субспецијалисти од Клиниката, појасни Цвејоска – Чолаковска.
На 17 јануари, од болницата во Струмица, со возило на Итна медицинска помош и во придружба на лекар, на Клиниката за детски болести било донесено четиригодишно женско дете, како што рече Цвејоска – Чолаковска, во исклучително тешка состојба, потхрането, хигиенски запоставено, со гангренозни промени на прстите на дланките и на стапалата.
Двегодишното девојче од Кичево на Ургентен било донесено во кома