Паркирањето во строгиот центар на Скопје од секогаш претставувал проблем за граѓаните, со оглед на гужвите и цените што се наплаќаат за да се паркираат таму.

Сепак, изгледа дека некои граѓани успеваат да ги заобиколат правилата за паркирање. Просторот под мостовите „Гоце Делчев“ и „Камени Мост“ на кејот на Вардар, веќе подолго време е претворен во паркинг простор. Во текот на летните месеци тука има доволно сенка за возачите да ги заштитат своите автомобили, а што е најважно, никој не им наплатува за паркирањето.

Но, што прават надлежните за да ја спречат оваа појава која предизвикува незадоволни реакции кај граѓаните кои ги почитуваат правилата и паркираат на просторите кои се за таа намена?

– Често вршиме акции со пајаците на Град Скопје и оваа локација често знае да се преполни со автомобили. Ние имаме седум пајаци и од ПОЦ имаат уште три, што не се доволни за да ја покриеме секоја точка во градот. Таа локација, и кога ќе ги подигнат пајаците автомобилите, за брзо се полни со нови – изјавија од ЈП „Градски паркинг“.

Сепак, тие велат дека очекуваат да се најде систематско решение, како што е на пример рампата што неодамна беше поставена кај ресторанот „Мал Алтан“.

[foogallery id=”42095″]