Ситуацијата во Мадрид загрижувачка, расте бројот на новозаразени со ковид-19
Во последните 24 часа, коронавирусот бил дијагностициран кај 1207 жители на главниот град.
Некои делови од Мадрид повторно ќе бидат затворени од следниот викенд, бидејќи последниве денови нагло се зголеми бројот на заразени со коронавирус, соопшти регионалната влада на Мадрид.
Ситуацијата во Мадрид е особено загрижувачка бидејќи во главниот град на Шпанија има 40 проценти од вкупниот број нови случаи. Во последните 24 часа, коронавирусот бил дијагностициран кај 1207 жители на главниот град.
Таму има 23 жаришта на вирусот, а откако основните училишта повторно се отворија минатата недела и средните училишта оваа недела, ризикот од ширење на вирусот е зголемен.
Во Мадрид жителите се движат со маски на лицето, кои задолжително ги носат на сите места. Последните денови имало поголема гужва на улиците и во сообраќајот, бидејќи дел од населението се врати во своите домови после летните одмори.
Шпанија е меѓу најсилно погодените од коронавирус во Европа. Во последните шест месеци се заразени повеќе од 600 000 жители, а повеќе од 30 000 починале.