Шок за шампионот, Сити поразен од „волците“ (ВИДЕО)
Шампионот Манчестер Сити доживеа вистински шок во осмото коло од Премиер лигата, губејќи со 0:2 од Вулверхемптон и тоа пред своите гледачи. Ова е втор пораз за „граѓаните“ во осумте кола со што му дозволија на лидерот Ливерпул да им избега на осум бодови разлика во битката за титулата.
Фудбалерите на Сити имаа целосна контрола врз топката но не успеаја да пронајдат начин да го совладаат одличниот голман на гостите, Руи Патрисио, и казната ги стигна во 80. минута кога Адама Траоре го совлада Едерсон за водство на „волците“.
Во судиското продолжение Траоре го постигна и вториот гол со што ја запечати судбината на „граѓаните“.
За разлика од Сити, останатите фаворити дојдоа до триумфи. Арсенал со голот на Давид Луиз во деветтата минута минимално го совлада Борнмут, додека Челси како гостин го декласира Саутемптон со 1:4. Голот за домашниот тим го постигна Ингс, додека Абрахам, Маунт, Канте и Бачуаи ги постигнаа головите за Челси кој од коло во коло игра се подобро под водство на менаџерот Френк Лампард.