Килијан Мбапе ова лето не го оствари сонот, да го облече дресот на Реал Мадрид и извесно е дека тоа ќе се случи идното лето. Според најавите на шпанските медиуми, ниту во зимскиот преоден рок нема да има промени во статусот на Мбапе, одличниот напаѓач ќе остане до крајот на сезоната бидејќи катарските шеици кои се сопственици на ПСЖ решија да го загубат без обесштетување отколку да го признаат поразот од Реал Мадрид.

Но, Мбапе освен со своите претпоставени во ПСЖ, не е во добри односи ниту со француските новинари кои ги обвинува дека се опседнати со него и поради тоа сака да си замине од Париз.

Француските новинари од друга страна откриваат дека Мбапе е далеку од идеална личност. Имено, новинарот на влијателниот „Фигаро“ Баптист Деспре во својата книга ја открива темната страна на Килијан Мбапе.

„Тој има неверојатен потенцијал, но воопшто не е лесен за соработка. Како што работите не се одвиваат според очекуваното на Европското првенство, тој станува непријатен и постојано коментира. Нормално, тоа влијае на целата репрезентација и на балансот во соблекувалната“, напиша новинарот Деспре кој не крие дека има свој извор од соблекувалната во француската репрезентација.

Пред стартот на Евро 2020, Мбапе влезе во конфликт со Оливие Жиру, а потоа на првенството одигра многу лошо и на крајот го промаши одличувачкиот пенал против Швајцарија по што се најде на удар на јавноста.

„Кога соиграчите не му обрнуваат внимание, кога не му оди секоја топка, тој брзо се лути и тоа ги иритира останатите фудбалери“, пишува Деспре со својата книга.

Иритантното однесување на Мбапе му донесе кавга со тренерите на ПСЖ, досега францускиот селектор Дидие Дешан смета дека тој е незаменлив во екипата и му ги толерира испадите.
„Ниту Тухел ниту Емери не се плашеа од Мбапе и не го толерираа неговото однесување. Поради тоа имаа големи несогласувања со играчот“, пишува Деспре.