На 16 ноември 2003 година во Серија Ц2 играа Санџованезе и Алианесе, а натпреварот заврши без голови. На трибините имаше само 1.400 гледачи, но интересно е што тренерите на двете тогашни екипи се последните двајца тренери на Јувентус. Маурицио Сари беше тренер на Санџованезе, додека Алианесе го предводеше Масимилијано Алегри.

– Во тоа време никој не веруваше во нас. Тој натпревар без голови, а немаше ниту еден шут во рамките на двата гола. По крајот на натпреварот, еден пријател ми рече: „Доколку вие двајца сте тренери, тогаш секој може да биде тренер“.
Се надевам и верувам дека сè уште во мене има дел од стариот Сари. Духот ми е ист, не го сменив начинот на кој гледам на фудбалот. Емоциите кои ги почувствував на натпреварот Санџованезе – Монтевархи се нешто што ретко повторно сум го доживеал во кариерата, дури играјќи и финале на Лигата на Европа – изјави Маурицио Сари.

Маурицио Сари моментно е тренер на Јувентус, а минатата сезона со Челси триумфира во Лигата на Европа, додека Масимилијано Алегри изминатото лето си замина од „старата дама“ откако пет години по ред триумфира во Серија А, а играше и во две финалиња на Лигата на шампионите.