Ружин: Резолуцијата е документ за внатрешна употреба со предизборна димензија
Резолуцијата на ВМРО-ДПМНЕ за утврдување на македонските позции во разговорите со Софија е непотребна, а ако не се постигне консензус, подобро да не се става на дневен ред во Собранието, оти така ќе нанесе штета, вели професорот Нано Ружин.
– Целта е да се потврди она што цело време го зборува власта, дека за македонскиот јазик и идентитет не се преговара, но таа нема да има особен ефект. Оваа резолуција повеќе е за внатрешна употреба, отколку за надворешна, затоа што таа нема правно дејство, нема правни аспекти. ВМРО-ДПМНЕ сака да се потврди себеси како чувар на македонскиот идентитет и ја пласира за да ги зајакне своите позиции во пресрет на локалните избори. Но, нашиот идентитет е утврден и признат и нема потреба да се потврдува на ваков начин. Ова ми личи како онаа акција на Фејсбук кога луѓето пишуваа јас сум Трајко Трајковски, јас сум Македонец, а тоа е тафтологија – вели Ружин за „Слободен печат“.
Тој додава дека постои можност овој настан да биде земен во лоша конотација од бугарска страна во контекст на решавањето на спорот.
– Кога темата ќе се отвори, за неа ќе се расправа и се плашам тоа да не предизвика повеќе несакани ефекти. Секако дека треба да се донесе со консензус. А СДСМ немаше каде да оди во ситуацијата во која го стави ВМРО-ДПМНЕ, едноставно не можеше да каже „не“. Затоа сметам дека сето ова има и предизборна димензија – вели поранешниот амбасадор во НАТО.