Во односите меѓу Република Северна Македонија и Република Бугарија, а најмногу во однос на наметнатото вето од страна на Бугарија, има влијание на трети страни и тие трети страни за мене се прилично јасни – тоа се Србија и тоа е Русија, изјави во вечерашното издание на „Топ тема“ на ТВ Телма бугарскиот аналитичар Владимир Владимиров.

Тој оцени дека влијанието на Русија во Бугарија е многу силно, што најдобро се гледа кога ќе се погледне економијата во земјата.

„Најголемата фирма во Бугарија е во руска сопственост, тоа е Лукоил Бугарија. Над 95% од нафтата и гасот во Бугарија доаѓаат од Руската Федерација. Имаме огромна зависност од Русија. Реформската влада на Петков е првата влада во новата политичка историја на Бугарија, значи 30 години од 90-тите, кое работеше и за еден месец ќе ја пушти гасоводната врска со Грција, како алтернативен извор за достава на гас. Тоа е разликата меѓу тоа што беше досега во Бугарија и новата реформска влада. Русија има огромно влијание во Бугарија“, вели Владимиров.

Според него, двајцата највисоки бугарски функционери во моментов, премиерот и претседателот, имаат различни гледни точки, кои се очигледни.

„Претседателот Радев е претставник на поконзервативната политика, дури во одреден степен, на малку повеќе националистичката политика, додека премиерот Кирил Петков е претставник на полибералната, поевропската политика“, оцени Владимиров.