Разговор со Сеад Хаџиќ – Сецко од бендот „Мугер Фугер“: Верни љубители на органскиот звук
На 11 март во „Ла Кања“ во Старата скопска чаршија и на 12 март во „Кјуб“ во Куманово, пријателите и љубителите на групата „Мугер Фугер“ можат да присуствуваат на слушачката промоција на нивниот нов албум со наслов „Дом на змии и влекачи“.
Скопската рок-група „Мугер Фугер“ во еден период објавуваше најмалку еден, а понекогаш и два албума годишно. По двегодишна пауза деновиве го промовираат својот 12-ти албум, овој пат со наслов „Дом на змии и влекачи“.
На тематски план групата создава песни во кои отворено ја изразува својата нетрпеливост кон неолибералниот капитализам. На музички план нивно обележје е страста кон аналогниот гитарски звук со психоделична атмосфера. На некои албуми навлегуваат во британскиот „шугејз“ и во американскиот „ноувејв“ стил. Името на бендот доаѓа од аналогните педали за електрична гитара „Мугер Фугер (moogerfooger)“. Заштитен знак на групата е и употребата на стара аналогна опрема.
Бендот функционира од 2004 година, првиот албум со наслов „Мугер Фугер“ го објавуваат во 2005 година, а како членови на бендот биле повеќе музичари од македонската рок-сцена. Во последниве неколку години чест гостин и соработник на бендот е Горан Трајкоски – Готра („Апореа“, „Падот на Византија“, „Мизар“, „Анастасија“), а таков е случајот и со новиот албум.
Двигател на идејата за опстојување на „Мугер Фугер“ е гитаристот Сеад Хаџиќ – Сецко, кој веќе има изградено свој и препознатлив гитарски израз. Специфично за неговата работа е што на концертните промоции на албумите, речиси, на секоја песна ја менува гитарата, а со него на сцената често има и по десетина различни гитари. Деталите за новиот албум на „Мугер Фугер“ ги дознаваме во разговор токму со Сеад Хаџиќ – Сецко.
Слушачка промоција на новиот албум „Дом на змии и влекачи“ на „Мугер Фугер“ се случува викендов во Скопје и во Куманово. Во кој формат, како чие издание и со кои членови на бендот е снимен и објавен албумот?
– Албумот е издаден на касета во траење од 90 минути, каде на А-страна се објавени осумте композиции од новиот албум „Дом на змии и влекачи“ со траење од 45 минути, додека на Б-страна од касетата е ставен албумот првенец на „Мугер Фугер“, снимен 2005та година, исто така во траење од 45 минути. Екипата која го свиреше и подготви албумот е во состав Сецко, Огнен, Диме, Готра, Ицко, Сашко К., Идриз, Салпе и Шикси. Издавачи на албумот се „Wire“ од Куманово, кои се едни многу амбициозни момци и музички фанови.
Зошто албумот го издавате на касета? Зарем тоа не е формат што веќе никој не го користи? Која е симболиката на тој потег?
– Како љубители на органскиот звук се одлучивме да снимиме ограничен број примероци од албумот на касета, а исто така албумот ќе има и свое дигитално издание. Ова е симболичен гест да се оддаде почест на изумителот на касетата, Холанѓанецот Лу Отенс, човекот кој засекогаш го смени начинот на слушањето музика и ја направи подостапна.
Ковид-пандемијата ја наруши вообичаената перцепција на времето, но околу две години поминаа од претходниот албум на „Мугер Фугер“. Свесно направивте дистанца од „Во ова време“?
– Времето поминато помеѓу двата последни албуми го посветив на моето семејство и на завршувањето постдипломски студии, додека случувањата со пандемијата само не поттикнаа да го кренеме гласот против неолибералниот корпорациски фашизам.
Насловната нумера носи цврст гитарски звук и вокал на Горан Трајкоски. Дали целиот албум е направен во тој правец?
– Албумот е одличен микс од психоделични гитарски звуци, аналогни синтисајзери, ритам машини и „олд скул“ тапани снимени на само два канали. Песните се овој пат подолги од вообичаено и траат по 7 или 8 минути.
Повеќе албуми наназад соработувате со Горан Трајкоски – Готра. Дали и на овој албум тој ги пишува текстовите?
– Готра е продуцент на албумот, текстописец на две песни, свири бас гитара, баритон гитара, гитара, синтисајзер и перкусии на двете песни кои ги отпеа на албумот.
Каков е тој „дом“ на змии и влекачи, фиктивен или реален? Која е вашата порака што би сакале да се слушне од албумот?
– Најавата дека изгубената реалност ќе ни биде заменета со уште една нова реалност не натера пораката која ја носи албумот „Дом на змии и влекачи“ да биде многу реална.
Постариот брат на „Мугер Фугер“ е бендот „Ласт експедишн“. Дали и со тој состав имате некакви планови годинава?
– Ха, ха! Секогаш имаме некакви планови што можат да се реализираат. Можеби годинава, којзнае.
(Разговорот е објавен во „Културен печат“ број 120, во печатеното издание на весникот „Слободен печат“ на 12-13 март 2022)