Рускиот претседател Владимир Путин му честиташе на новоизбраниот врховен лидер на Иран, Моџтаба Хамнеи, за неговиот избор на функцијата денес, соопшти Кремљ, пренесува „Волстрит журнал“.

„Сега, кога Иран се соочува со вооружена агресија, вашата работа на оваа висока позиција несомнено ќе бара голема храброст и посветеност. Уверен сум дека со чест ќе ја продолжите работата на вашиот татко и ќе го обедините иранскиот народ во услови на тешки искушенија“, се вели во честитката на Путин до Хамнеи, според новинската агенција Интерфакс.

Путин ја потврди поддршката на Москва за Техеран и солидарноста со иранскиот народ.

„Русија беше и ќе остане сигурен партнер на Исламската Република Иран. Ви посакувам успех во справувањето со тешките предизвици со кои се соочувате, како и добро здравје и сила на духот“, се вели во соопштението.

Вчера, Собранието на експерти го избра ајатолахот Моџтаба Хамнеи (56), син на убиениот претходен врховен лидер ајатолахот Али Хамнеи, за трет лидер на Исламската револуција, лидер на Исламската Република Иран и врховен командант на вооружените сили.

Ајатолахот Али Хамнеи беше убиен на 28 февруари во американско-израелски напад врз неговата резиденција во Техеран, поради што иранските власти прогласија 40-дневна жалост во земјата, пренесува Танјуг.