Празник на музиката: „Скопско лето“ со одложен, но не откажан, термин
Традиционално, веќе 40 години, на 21 јуни, односно првиот ден на летото – долгоденица, почнува „Скопско лето“, но годинава поради ситуацијата со коронавирусот почетокот на фестивалот е одложен за крајот на месецот, а денот, сепак, ќе биде одбележан со „Празник на музиката“, онлајн настан на Францускиот институт.
Дирекцијата за култура и уметност на Скопје и оваа година, под покровителство на Град Скопје и со поддршка од Министерството за култура на Република Северна Македонија, работи на организација на најновото, четириесет и прво издание на омилениот летен скопски фестивал. Уметниците и авторите веќе ги подготвуваат своите проекти и програми, со цел да бидат дел од културното живеење на главниот град на државата и да бидат со својата верна и благородна публика.
– Во очекување на официјалните протоколи и препораки на здравствените и на државните органи за организација на културните настани оваа година, за жал „Скопско лето“ ќе почне нешто подоцна, кон крајот на јуни, односно почетокот на јули. Како и да е, пред нас повторно ќе бидат вечери исполнети со музика, театар, филм, изложби. За конечниот изглед на овогодишната програма наскоро ќе информираме – велат од Дирекцијата за култура и уметност на Скопје.
Покрај вонредната ситуација, „Скопско лето“, сепак, ќе го задржи својот основен белег, одбележувањето на првиот ден на летото и Светскиот ден на музиката, односно Празникот на музиката, благодарејќи на Францускиот институт во Скопје. Програмата подготвена за Празникот на музиката ќе се одржи онлајн на 21 јуни, а ќе биде пренесувана преку фејсбук-профилите на „Скопско лето“ и на Француски институт. Програмата се реализира во соработка и со поддршка од Францускиот институт во Скопје и со Француските алијанси во Тетово и во Битола.
Во рамките на програмата на настанот Празник на музиката се предвидени франкофонски песни во изведба на групата „Фолтин“, настап на Тома Дитрон и неговата најнова музичка нумера „C’est si bon“, што ја изведува со Дијана Крал и Иги Поп, како и изведба на композицијата „Кога го бркаме волкот“ на младиот композитор Ерван Шандон, во изведба на музичкиот оркестар „Фаме’с“.
(Текстот е објавен во „Културен печат“ број 36, во печатеното издание на „Слободен печат“ на 20-21 јуни 2020)