Многу реакции деновиве предизвика слика од матурското табло на гимназијата од Македонски Брод, на кое има повеќе наставници од ученици. Само 11 матуранти годинава ќе го завршат средното образование во гимназијата, а во нивното училиште предаваат 22-ца професори.

Во училиштето има две паралелки од четврта година – едната по гимназиско образование, во која ќе матурираат осум ученици, а втората е по угостителство и туризам – во неа дипломи ќе добијат само тројца ученици.

Надзорот на инспекторите од образование покажал дека во училиштето сите активности се одвиваат според наставни планови и програми, а условите се безбедни и соодветни за изведување настава, пишува „Телма“, додавајќи дека повеќето средношколци во Македонски Брод се одлучуваат да се запишат во училишта во Битола и Кичево, наместо во гимназијата во родниот град.