Телевизиската екипа на 1ТВ денеска го одржа последниот Дневник пред заминување на принуден одмор, а потоа направија групна фотографија и објавија соопштение.

Соопштението ви го пренесуваме во целост:

„Вечерва, 24.07.2019, можеби беше и последниот Дневник кој го гледавте на 1ТВ. Најголемиот удар кој новинарството може да го доживее е згаснување на еден медиум. Згаснување на јавен простор, за што веруваме дека никому не оди во прилог, особено не на државата која е пред портите на НАТО и ЕУ, односно највисокото ниво на демократски вредности.

• Новинарите и другите вработени во 1ТВ од денеска на принуден одмор

Денеска, исправени пред предизвикот на овие тешки две недели за телевизијата, соочени сме дури и во вакви услови да не отстапиме од објективно и професионално известување. Тимот на 1ТВ ги почитува сите новинарски стандарди и известува непристрасно. Гледачите беа сведоци дека 1ТВ ги изнесе сите информации во јавноста, дури и во услови кога иднината на телевизијата е загрозена. Сепак, случувањата поврзани со Бојан Јовановски, влијаат и на медиумот“, се наведува во обраќањето од телевизијата.

„Да се надеваме, дека ова не е одјава, туку свеж почеток за рестартирање на 1ТВ“, нагласуваат од телевизијата.