Создавачите на првата вакцина одобрена на Западот рекоа дека наглиот пораст на новозаразени со ковид-19 во земјите во развој, како Индија, среде релативен недостаток на снабдување со вакцини, значи дека пандемијата ќе трае до средина на 2022 година.

„Властите заради итноста на ситуацијата треба да разгледаат мерки како што се мешање и совпаѓање на вакцините од различни производители“, рекле во вторникот основачите на Бионтек, а пренесува Вол Стрит Журнал.

„Мораме да обезбедиме големи стапки на вакцинација насекаде низ светот, инаку никој нема да биде безбеден“, рекол Угур Сахин, извршниот директор на „Бионтек“ и додаде дека пандемијата ќе престане дури кога низ целиот свет ќе се постигне колективен имунитет.

„Кон средината на 2022 година дури и регионите со голема густина на жители, како што е Индија ќе достигнат висока стапка на имунизација, а со тоа ќе постигнат и имунитет на стадо. Во следните 12 месеци заради зголемените производствени капацитети на моменталните компании и создавање на нови производни подрачја, ќе се видат поголем број на земји во развој и сиромашни земји кои ќе достигнат колективен имунитет“, рекол извршниот директор на „Бионтек“.

Сахин, кој ја основа компанијата со сопругата Озлем Туреци, рекол дека ја прошируваат соработката со повеќе од 30 компании за да произведат поголемо количество на вакцини за снабдување на држави како Индија.