Чезаре Прандели ја напушти клупата на „виолетовите“, потврди денеска клубот од Фиренца..Како што е објавено, тој поднесе оставка на функцијата тренер на која дојде во ноември минатата година.

– Фиорентина може да потврди дека Чезаре Прандели поднесе оставка на местото тренер на клубот кој со голема тага ја прифати одлуката – стои во соопштението.

Под негово водство екипата забележа шест победи, исто толку нерешени и 11 порази за моментно 14 место на табелата во шампионатот со 29 бодови.

– Ова е вторпат да ја напуштам Фиорентина. Првиот пат не беше моја одлука, но овој пат беше. Во животот, покрај добрите времиња, има и темни моменти кои можат да ве срушат. Поминав низ период на постојано нарушување што ме спречуваше да бидам она што сум навистина. Ова искуство го започнав со радост и љубов, поттикнато од ентузијазмот на новите сопственици. Можно е мојата љубов кон градот и сеќавањата на одличните моменти кои ги доживеав овде, да ме направи слеп за раните знаци дека нешто не е во ред внатре.

Мојата одлука беше водена од огромната одговорност што ја имам кон играчите, клубот и – последно, но не и најмалку важно – кон навивачите на Фиорентина, кои многу ги почитувам – се зборовите на Прандели.