Граѓаните би прифатиле ново пролонгирање на плаќањето на ратите од кредитите и картичките, но само ако останат актуелните каматни стапки. Сепак, засега нема ништо ново за оваа тема и останува рокот до крајот на септември, до кога течат само камати, а не се отплаќа главницата. Мерката завршува во октомври, а до тогаш ќе се следи состојбата која ја донесе пандемијата. Над 70 проценти од граѓаните ја избраа опцијата за одложено плаќање.

-Регулаторните измени со коишто се овозможи олеснување на финансискиот товар на засегнатите кредитокорисници, за банките и штедилниците важат до крајот на септември, но ако биде потребно, ќе се разгледа можноста нивната важност да биде продолжена – рекоа претходно од Народна банка.

Фирмите им должат на банките 2,7 милијарди евра, а граѓаните 2,8 милијарди евра. НБРМ нема законска можност да прогласи мораториум на наплатата на кредитите, туку само да преговара со банките за да му излезат во пресрет на населението и стопанството и во та насока да ја усмерува регулативата. Мораториум на обврските за кредити прогласија Италија (до крај на коронакризата), Унгарија и Австрија до крајот на годината, а Црна Гора, Србија, Албанија во период од 3 месеци.

-Доколку во натамошниот период, околностите поврзани со пандемијата на ковид-19 наметнат потреба од нови активности, членките на МБА ќе ја разгледаат можностa за понатамошна помош на  населението и стопанството во услови на пандемија-рекоа од оваа асоцијација.

Според податоците на Народната банка во првиот квартал од годината 4,7 проценти од кредитите не можеле да се наплатат. Периодот не ги опфаќа април, мај и јуни. Годишната стапка на раст на депозитите на корпоративниот и граѓанскиот сектор изнесува 8,4 проценти, а кај вкупните кредити растот изнесува 6,6 проценти и се должи на зголеменото кредитирање и на компаниите и на домаќинствата.