Шест години од започнувањето со работа на независниот театар „Златен Елец“ се навршуваат овој февруари 2026 година, кој беше основан во 2020 година и до сега има достигнато бројни резултати и успеси.

Театарот „Златен Елец“ во овие шест години ги постави претставите „Не ми го чепкај пивото“ и трите монодрами „Дневникот на лудиот“ во режија на Ѓорѓи Ризески, „Шапка, чоколадо, анус и уште нешто“ во режија на Ана Батева, претставите за деца, стендап настапите односно шоуто во изведба и авторство на Надица Петрова и продукциите во режија на наградената режисерка Тамара Стојаноска: „Грета“, „Разнесени“, „Пингвинот“, „Добри луѓе“, „Хинкеман“, „Сина сенка“ како и најнаградуваната претстава „Кенди“, после „Дневникот на лудиот“ во изведба на Бобан Алексоски.

– Наградите и успехот на претставите се само поттик за поголема храброст и работа – велат од Театар „Златен Елец“ на кои годинава им припадна честа да ја напишат македонската порака по повод Светскиот ден на театарот, а избрани се од Интернационалниот театарски институт во Македонија.

На 23-ти февруари во Младинскиот културен центар во Скопје ќе биде одиграна најновата претстава „Сина сенка“ во режија на Тамара Стојаноска од авторот Брајан Рејнолдс, каде играат актерите: Кристијан Танчевски, Мина Јелушиќ Јериниќ, Бобан Алексоски, Сара Спиркоска, Ане Блажовски, Ема Лазарова, Кристијан Петковски и Стефан Арсиќ, музиката е на Мајкл Хукер и Лука Тошев.

Потоа на 27-ми февруари во театарот „Јордан Хаџи Константинов – Џинот“ во Велес на репертоарот е претставата „Добри луѓе“ според Данкан Мекмилан во режија на Тамара Стојаноска. Во оваа дуодрама играат Тијана Трајчевска и Филип Христовски, продуцент е актерот и еден од основачите Бобан Алексоски.

На 28-ми февруари во МКЦ Скопје ќе се одигра „Хинкеман“ од Ернст Толер, исто во режија на Тамара Стојаноска, каде играат: Бобан Алексоски, Филип Христовски, Надица Петрова, Талија Настова, Ане Блажовски, Бранко Михајлоски и Леонида Гулевска, музиката е на Лука Тошев. Сите изведби се со почеток во 20 часот.

Претходно на 19-ти февруари, актерката Надица Петрова со своето театарско шоу ќе настапи во Охрид, а на 1-ви март повторно на репертоар после подолго време е претставата за деца „Чудесниот напиток“ во „Јавна соба“ во Скопје со почеток во 18 часот.

Следните месеци продолжуваат со репризи, гостувања и учества на фестивали со претставите.

Театар „Златен Елец“ оваа година ќе има премиери на претставите „Теорема“ според Пјер Паоло Пазолини во режија на Мирко Радоњиќ и дуодрамата „Свињи“ од Томислав Зајец во режија на Тамара Стојаноска. Во план се уште неколку нови активности и продукции – известуваат основачите на театарот.