Неодолив десерт на Стефанија Несторовска – овесни барови со тиква и чоколадо
Благодарение на вештите раце и инвентивноста на Стефанија Несторовска, која стои зад инстаграм-профилот и блогот snestorovska.com, секогаш имаме можност да пробаме нешто интересно и несекојдневно. Стефанија овој пат ни приготви овесни барови од тиква и чоколадни парчиња.
Состојки:
– 2 филџани (450 г) пире од тиква
– 2 јајца
– 1 филџан (240 мл) млеко од бадем
– 1/2 филџан (160 г) јаворов сируп
– 1/2 лажичка ванила екстракт
– 2+1/2 филџан (225 г) овес, крупен
– 2 лажички прашок за печиво
– 2 лажички цимет
– 1/2 филџан (85 г) чоколадни парчиња + еден грст за топинг
Подготовка:
Се загрева рерната на 170 степени и се поставува хартија за печење на калап за печење. Јас користев сад со димензии 20х20.
Во голем длабок сад се додаваат пирето од тиква, јајцата, млеко од бадем, ванила и јаворов сируп. Се промешува сѐ додека не се соединат состојките.
На оваа смеса, во истиот сад се додаваат и сите останати состојки освен чоколадните парчиња. Се промешува. Смесата треба да биде прилично течна. Ако ви излезе многу густа, додајте уште 1/4 филџан млеко.
На крај се додаваат и чоколадните парчиња и се распоредуваат низ смесата.
Се додава смесата во калапот за печење.
Се додаваат и остатокот од чоколадните парчиња на површината од колачот.
Се пече 35 минути.
Се остава да се излади пред да се исече на барови. Додека е уште топло, ќе биде меко и ќе се распаѓа, затоа е многу важно да го оставите да се излади пред да сечете. Не е лошо ни така распаднато, но ако сакате барови – тогаш задолжително следете го овој чекор.
Забелешки и совети:
→ Можете слободно да користите и ситен овес, но моја препорака за овој рецепт е да набавите крупен овес за најдобри резултати.
→ Јаворовиот сируп може да се замени со кој било друг течен засладувач.
→ Ако сакате да ви биде ова опција за појадок – би ви препорачала да намалите на чоколадните парчиња во составот – за мене лично вака е одличен десерт, но јас сакам понеутрален појадок, па дури и кога е благ.
→ Наместо чоколадни парчиња може да користите сечкани јаткасти плодови (ореви би биле идеални во оваа комбинација), кокос и слично…
