Управата на Барселона интензивно работи на наоѓање на долгорочно решение за клупата на каталонскиот тим откако минатата недела отказ доби Роналд Куман.

Речиси сите спортски медиуми објавија дека нов тренер на Барселона ќе биде легендарниот капитен од златните денови на каталонскиот тим, Чави Ернандез, а неговата промоција се очекува да биде за време на ноемвриските репрезентативни активности во квалификациите за СП 2022.

Денеска каталонскиот весник „Спорт“ од извори во клубот дознава дека еден од главните услови за Чави да седне на клупата на Барселона ќе ги израдува навивачите бидејќи како свој помошник го сака исто така поранешниот капитен Карлес Пујол.

Наводно, Чави сака Пујол да го внесе војничкиот дух во соблекувалната и во екипата и подобар од него за оваа работа нема. Пујол е дете на Барселона, целата кариера ја помина на „Камп Ноу“, а се пензионира во 2014 година поради повредите.

Карлес Пујол веќе имаше понуда да се врати во Барселона, поранешниот претседател Хосеп Марија Бартомеу му нудеше да биде дел од управата и таа понуда ја одби, но се очекува сега да го прифати повикот од Чави.