На 104-годишна возраст: Почина српската актерка Бранка Веселиновиќ
Српската театарска, филмска и телевизиска актерка Бранка Веселиновиќ денеска почина на 104-годишна возраст.
На 16 септември минатата година, таа го прослави нејзиниот 104. роденден и со тоа стана најстарата белграѓанка, но и најстарата жива актерка во светот.
Во таа прилика, заменик-градоначалничката на Белград, Весна Видовиќ ѝ подари роденденска торта и цвеќе, а Веселиновиќ не ја криеше возбудата и благодарноста за овој гест.
„Добро е да се покажуваат емоции. Ова се тие изненадувања кога човек реагира од срце. Човекот не треба да се сака себеси заради себе, туку заради другите луѓе, заради сите оние што ги сака, со кои се дружи, кои го посетуваат, заради болните, заради децата на кои им се посветил. Затоа секој ваков гест ми е голема чест“, изјави тогаш актерката.
За време на својата актерска кариера, Бранка Веселиновиќ играше во повеќе од 100 театарски претстави и во повеќе од 50 телевизиски серии и филмови.
Исто така, таа е добитничка на бројни награди и признанија за нејзината актерска и хуманитарна работа како амбасадор на УНИЦЕФ.
ВИДЕО | Најстарата белграѓанка: Актерката Бранка Веселиновиќ наполни 104 години