Кошаркарите на МЗТ Скопје Аеродром пропуштија одлична можност да се вратат со победа од гостувањето кај Ловќен во рамките на АБА2 лигата. „Металците„ во последната четвртина имаа дури девет поени предност (54:63) но крајот триумфира домаќинот со 73:69 и му го нанесе третиот пораз на македонскиот шампион во 11. коло.

МЗТ Скопје Аеродром имаше неверојатна серија во второто полувреме, во финишот на третата и првата половија од четвртата четвртина кога направи серија од 26:7 и кога се чинеше дека победата е на дофат се случи невиден пад во играта кој домашните кошаркари знаеја да го искористат. „Металците“ промашија дури 10 слободни фрлања, но и непрецизниот шут за три поени во одлучувачките моменти од натпреварот.

Милутин Ѓукановиќ со 23 поени беше прво име во победничкиот табор, додека Врбица постигна 12, а Хаџибеговиќ 11 поени. Кај „металците“ капитенот Дамјан Стојановски мечот го заврши со 20 поени, додека Херис и Хиндс уфрлија по 12.