Моџтаба Хамнеи наводно пренесен во Москва поради здравствени и безбедносни причини
Новиот врховен лидер на Иран Моџтаба Хамнеи, наводно со руски воен авион во строго тајна операција, е префрлен во Москва поради неговата здравствена и безбедносна состојба. Според пишувањата на британски „Сан“, Хамнеи е однесен во Москва на операција на ногата која „лично била понудена од Путин“ откако претрпел сериозни повреди за време на воздушните напади од страна на САД и Израел.
Препорачано
По пристигнувањето, како што пишуваат медиумите тој веднаш бил подложен на „успешна“ операција и моментално се лекува во болница во еден од претседателските комплекси во Москва.
Според извор близок до новиот ирански врховен лидер, повредите што Моџтаба ги здобил за време на американско-израелската воена кампања во првичните напади врз Иран на 28 февруари барале добро опремена болница, внимателно медицинско следење на неговото здравје и посебни безбедносни мерки кои, според извештаите, е невозможно да се обезбедат во Иран во овој момент.
Изворот објаснил дека иранските безбедносни служби биле особено загрижени дека локацијата на Хамнеи би можела да биде откриена преку следење на лекарите и специјалистите кои би го лекувале. Затоа, препораката од Москва која подоцна била прифатена од Техеран е дека најдобро би било третманот на лекување на Хамнеи да се спроведе во Русија.
Путин предложил Хамнеи да се лекува во Русија?
Изворот исто така посочил дека рускиот претседател Владимир Путин лично предложил Моџтаба да се лекува во Русија за време на телефонскиот разговор со иранскиот претседател Масуд Пезешкијан кој беше одржан минатиот четврток. Иранските претставници, вклучувајќи го и самиот Хамнеи, го разгледале рускиот предлог и истиот го одобриле. Како што наведуваат медиумите Моџтаба потоа бил префрлен во Русија во четврток вечерта, каде што го лекува тим руски лекари, а го придружуваат и тим од неколку ирански лекари.
Од друга страна според извори во Тел Авив, израелските разузнавачки служби веруваат дека повредата на Моџтаба може да биде посериозна отколку што првично се сметаше, додавајќи дека Израел нема потврдени информации дека тој го напуштил Иран.
