Функционери и членови на Алијансата за Албанците (АА) започнаа мистериозна кампања на социјалните мрежи со слоганот: „Кого ќе изберете?“. Дали ова е најава за нова изборна програма за локалните октомвриски избори или, пак, станува збор за маркетиншки трик? 

Потпретседателот на АА, Ремзи Мехмеди за „Слободен печат“ вели дека во моментов ова прашање упатено до граѓаните е само едно од изненадувањата на опозицијата за локалните избори во октомври.

– Во моментот, во стратегијата на самата кампањата информациите се само за ова прашање. Кампањата ќе продолжи со многу други изненадувања – рече Мехмеди.

„Слободен печат“ од добро информирани извори во албанскиот опозициски политички табор дознава дека АА и Алтернатива до изготвувањето и презентирањето на новата изборна програма, која ќе биде објавена со официјалната промоција на кандидатите за градоначалници, ќе продолжат со мистериозната кампања на социјалните мрежи.

– Политичката програма се подготвува заедно со граѓаните. Откако ќе биде готова, тоа ќе биде објавено и за пошироката јавност. Што се однесува до кандидатите за градоначалници, ние сме во процес на предлози и анализи, во догледно време, тие ќе бидат познати и за пошироката јавност – изјави за „Слободен печат“, потпретседателот на АА, Ремзи Мехмеди.