Македонскиот репрезентативец Бојан Миовски сезонава постигнува голови за шкотскиот Абердин и тоа беше причина да се објават информации дека гигантот Селтик покажува интерес за услугите на нашиот напаѓач.

Актуелниот првак на Шкотска, Селтик е во потрага по квалитетни засилувања, а наводно Миовски е една од желбите.

Од Абердин не се загрижени, не се брза за евентуална разделба со Македонецот, а и Миовски е среќен во својот клуб.

– Имам уште две и пол години договор со Абердин и да бидам искрен се чувствувам одлично. Сè што се шпекулира и пишува за мене е нормално бидејќи кога покажуваш добра форма и постигнуваш голови секогаш те гледаат поголемите клубови. Во Абердин сум година и пол и презадоволен сум и се надевам дека и луѓето во Абердин се задоволни од мене. Досега имам постигнато 33 гола за клубот – рече Миовски.

Селтик оваа зима најверојатно ќе бара друго решение за нападот, се следат и настапите на Лоренс Шенкленд од Харт оф Мидлотиан и Матијас Квистгарден од данскиот Брондби.