Милошоски: Луѓе блиски до власта купувале земја на трасата на коридорите, за да ја продаваат поскапо
Пратеникот на ВМРО-ДПМНЕ, Антонио Милошоски, тврди дека партијата има информации оти луѓе блиски до првите функционери во Владата знаеле каде ќе поминуваат коридорите 8 и 10-Д и веќе купувале земјиште за подоцна да добијат многу повисоки цени при експропријацијата.
Тој смета дека евентуална меѓународна арбитража за Коридорите 8 и 10-д ќе се одвива според законите на Англија и Велс и дека „ова е напишано црно на бело во договорот меѓу „Бехтел-Енка“ и Владата“.
Милошоски во емисијата „Патот кон“ на „Алсат“ рече дека оваа согласност на Владата е во корист на конзорциумот.
Говорејќи за предложените законски измени поврзани со реализацијата на автопатиштата, Милошоски рече дека ваквите измени не ги забрзуваат работите, туку ги зголемуваат трошоците. Во однос на испраќањето на договорот со „Бехтел и Енка“ до Јавното обвинителство, Милошоски вели дека тоа се прави „со цел Владата да купи време и да избегне негово објавување“.