Маск повторно ја презеде титулата најбогат човек на светот
Мултимилијардерот Илон Маск повторно ја презеде титулата за најбогат човек на светот, објави „Форбс“. Маск се искачи на првото место благодарение на растот на акциите на „Тесла“. Неговото богатство денеска се зголеми за уште 4,1 милијарди долари или за повеќе од 1,75 отсто и сега изнесува 240,7 милијарди долари.
Акциите на „Тесла“ утрово се зголемија за повеќе од 2,5% на нешто повеќе од 266 американски долари. Тоа беше закрепнување по остриот пад на вредноста на акциите минатата недела. Нето вредноста на Маск сега ја надмина онаа на Бернар Арно, извршен директор на францускиот производител на луксузни производи „ЛВМХ“.
„Луј Витон“, „Кристијан Диор“ и „Тифани“ се во сопственост на „ЛВМХ“. Нето вредноста на Арно денеска потона за 2,4 милијарди долари, или повеќе од 1 отсто, на 234,9 милијарди долари.
Маск ја загуби титулата за најбогат човек на светот во петокот, само неколку дена откако накратко ја врати. Изгуби околу 18 милијарди долари во четвртокот бидејќи акциите на „Тесла“ потонаа, што беше пад за речиси 10% по лошиот квартален извештај за заработка.
