Ракометарите на Е. Пелистер утревечер (20.45 ч.) против германскиот Магдебург го играат првиот осминафинален натпревар во рамки на Лигата на Европа. Иако бундеслигашот во двомечот влегува како фаворит, пелистерци најавуваат голема борба и ќе дадат се од себе за да го изненадат Магдебург.
– Секој натпревар со бундеслигаш е голем натпревар. Штета што нема публика да биде поинтересно. Ќе дадеме сè од себе да извелечеме добар резултат во Битола, па во реваншот ќе се бориме колку што можеме. Секако дека Германците се фаворити, ние ја имаме улогата на аутсајдери и наше е да покажеме дека тоа не е така. Карактеристиките за нивниот најдобар ракометар Безјак ни се познати. Добро влече полуконтра и игра еден на еден, така да ќе се обидеме да го затвориме. Голема улога во играта на Магдебург има и десниот бек со шутевите од надворешните позиции – вели Маркоски.