Француската крајнодесничарка Марин Ле Пен не успеа во обидот да ја поништи одлуката да биде исклучена од избори, пишува Франс24.

Државниот совет, највисокиот управен суд во Франција, ја одби жалбата на пратеничката и лидерка на партијата Национален собир. Судиите истакнаа дека прописите што се во прашање можат да се изменат единствено со промена на законот.

Ле Пен претходно во април беше осудена за злоупотреба на средства од Европската унија. Најконтроверзниот дел од пресудата е петгодишната забрана за учество на избори, која стапи во сила веднаш, за разлика од делумно условната затворска казна. Таа поднела посебна жалба против самата пресуда.

Следните претседателски избори, на кои Ле Пен планираше да се кандидира, се закажани за 2027 година. Сепак, поради тековната политичка криза во Франција, постои можност за предвремени парламентарни избори, на кои исто така ѝ е забрането да учествува.