Ерлинг Халанд заедно со Килијан Мбапе се двајцата најбарани фудбалери за кои фудбалските гиганти се очекува да заборават на финансиската криза наредното лето.

Нема ниту еден гигант кој не посакува да дојде до потписот со барем еден од двајцата млади напаѓачи, а еден од клубовите кои сигурно ќе се вклучи во трката е Манчестер сити.

„Граѓаните“ се заинтересирани на лето да го донесат голгетерот на Борусија Дортмунд, Ерлинг Халанд, кој треба да ја добие улогата на прв напаѓач на тимот бидејќи на лето ќе си замине Серхио Агуеро.

Менаџерот на Сити, Пеп Гвардиола, има ас во ракавот во преговорите со германскиот тим и тоа благодарение на Џејдон Санчо, пишува „Билд“.
Според германскиот магазин, кога Сити го продаваше Санчо на Борусија вметна клаузула според која треба да им припаднат 15 проценти од наредниот трансфер на англискиот репрезентативец. Наводно сега „граѓаните“ се подготвени да се откажат од тој процент во замена на предност на купување на Ерлинг Халанд.

Според „Билд“ навивачите на Борусија не би требало да стравуваат бидејќи Халанд ќе остане и наредната година, по што во 2022 година ќе се активира откупната клаузула во вредност од 70 милиони евра, што претставува ситниш за играч од калибарот на Халанд. Но, Манчестер сити ќе се обиде да ја надмудри конкуренцијата и ќе се обиде да се договори уште ова лето искористувајќи го адутот наречен Џејдон Санчо.