Македонските футсалци одиграа реми со Србија
Денеска македонската футсал репрезентација денеска во натпреварот од третиот круг од квалификациите за Европското првенство ремизираше со селекцијата на Србија (1:1).
Головите на теренот во Врање беа реализирани во првото полувреме, домаќините поведоа со погодокот на Пршиќ (03:30 мин.) „Црвено-жолтите“ дојдоа до второто реми во овие квалификации благодарение на голот на Крстевски (09:47 мин.). Голема заслуга за ремито имаше и нашиот голман Петровски кој одбрани голем број на удари од страна на ривалите.
Статистички Србите доминираа од аспект на обидите за реализација, ги имаа вкупно 33, од нив 13 во рамките на нашиот гол. Нашите футсалци имаа само четири обиди, три во рамките на противничкиот гол.
Три дена подоцна во СЦ „Јане Сандански“ – Скопје ќе се одигра возвратниот дуел помеѓу овие две репрезентации.
Потсетување дека во воведните два меча избраниците на селекторот Васко Скендеровски загубија со 2:1 од Босна и Херцеговина на гостински терен, а дома одиграа нерешено со Романија (2:2).
На табелата во квалификациската група „4“ после три кола води Босна и Херцеговина со девет бодови која веќе слави пласман на континенталниот собир, а по два бодови имаат Романија, Македонија и Србија.