Македонски басни: „Беседа на фауните“ на Ристо Давчевски
Друштвото за издавачка дејност „Македоника литера“ од Скопје го објави третиот том од досега непубликуваните басни на македонскиот писател Ристо Давчевски (1935-2009), како дел од триесетлогијата во десет тома со заеднички наслов „Беседа на фауните“. Третиот том содржи три книги со близу триста негови басни за млади и за возрасни: „Лагата не умира“, „Луда басна“ и „Сто и еден пријател“.
Авторскиот проект на Ристо Давчевски, кој е оригинален и единствен, содржи 30 книги со 3000 басни распоредени во 10 тома, а досега беа објавени два тома (2011 и 2014 година). Десеттомната серија претставува исклучително богатство не само за македонската литература, туку и за светската: досега ниеден автор на басни во светот не оставил зад себе толку обемен опус на басни.
Најпознатите – Лафонтен има 12 книги и Езоп 600 басни, а Ристо Давчевски за време на својот 60-годишен творечки период напишал 6.000 басни, од кои повеќето од половината не се објавени. Проектот на Давчевски „Беседа на фауните“ е создаван дваесетина години, а оригинален е по тоа што половина од басните се посветени и на возрасните читатели.
(Текстот е објавен во „Културен печат“ број 41, во печатеното издание на „Слободен печат“ на 25-26 јули 2020)